Një nga faktorët e rëndësishëm që ndikon në zhvillimin e të folurit te fëmijët është koha që prindërit kalojnë së bashku me ta.

Logopedia, Luljeta Kabashi, për Arbresh.info ka folur lidhur me rëndësinë e komunikimit me fëmijë dhe kohën kualitative që duhet të kalohet me ta

Shpenzimi i kohës cilësore në aktivitete bashkëpunuese dhe komunikim aktiv ka një ndikim të drejtpërdrejtë në zhvillimin e aftësive të të folurit.

“Fëmija ndihmohet në ambientin e shtëpisë, se aty kalon një kohë më të gjatë, dhe është e rëndësishme të inkurajohet për komunikim dhe prindi të jetë një model i mirë për komunikim, dhe një kohë kualitative cilësohet duke i treguar përralla, duke luajtur, dhe duhet të i japin radhën fëmijës të flasë, duhet të ketë mundësin të shprehet pa e korrigjuar dhe pa e përmirësuar por duke i dhënë model”, shprehet ajo.

Tutje, Kabashi tha se logopedi nuk fillon me trajtim menjëherë, por mund të jep sugjerime që edhe në ambient të shtëpisë të ndryshohet qasja e komunikimi.

“Sugjerohet që prindërit në mënyrë kualitative të kalojnë kohën me fëmijë, tu lexojnë përralla, të bisedojnë, t’i japin rend fëmijës”, tha ajo.
Në këtë kontekst, roli i prindërve në mbështetje të zhvillimit të fëmijës është kyç për të parandaluar probleme të mundshme në komunikim./ Arbresh.info/Qëndresa Luma/